Bampaangi zaame,

Ntaangu ike ku mono mu laanda mam'viimba mavovokele mu bilumbu byaabi mu M'fuma Nekoongo matadilaanga keti nki a mpila tufwete sonikina ndiinga eeto a Kikoongo. Mamo mambote kwaandi mavovokele : nkuumbu aandi ku mbaanz'a matoondo. Bukina vo ku ntaandu fyooti yayele, save kyawanukini ku nzo ko, yaleembana mu laandila taanga mawoonsono. Mpeleko venina ye mpova zan'kaka kazeti kweenda beetela ye mabaanza maame ko, kaansi kyena kwaame fiinda mpaka ye foongo dya mviimba ko. Kadi, vo ndendele vaana mbaandu ya nswaasani zena mu ndiinga ziyalongoka ye ngyeti sadila (dede ki-ebeleo ye ki-greka), ban'kaka baleenda baanza vo ngatu kiduka nzolele kiduka. Kavena dyaambu ko. Kadi ndiinga i 'ma kivwiidi luziingu : mbutukilu, nkudilu ye vo mpe mfwiilu. Mu dyoodyo, katekisimu Taata Diego Gomes kasonika mu ndiinga kikoongo mu m'vu wa fuunda dimosi ye nkama saambanu ye makumoole ye ya, ye kyookyo beti sadila ku dyoseeze dya Mbaanza-Koongo wuunu (mu mv'u wa mafuunda moole ye tatu), nsonokono zaswaasana zina. Kavena dyaambu ko : kadi bana bateele, bana basekole ; lusonika buna bu lwalongokela. Kaansi, tuwiizana : vena ye maambu mena matekama mu mpovolo ya bampaangi ban'kaka ye nzolele siingika :

1° Mono kikoongo kyalongoka kyoko. Kaansi ku sikuulu zan'nene yalongoka lengwistiki ye nsonokono ya ndiinga za Afrika, suungula za kaanda dibokudulwaanga vo : BANTU. Tuuka kiina, yabaka lukanu lwa toma vova ye toma sonika ndiing'a Kikoongo.

2° Kinkulu ngyeti fyongununa (tuuka 1987) kitadidi kaka nlesi mya luvila lwaame ye kaanda dyaame.

3° Bambuta za Dibuundu bamfila mu kwiza longoka ku sikuulu zan'nene kwaaku Roma. Idiina ngi laandaanga ndongokolo a maambu ma Nzaambi ma "Mvuungudulu a baantu baziingilaanga mu nsi za kinzeenza" (Thélogie Pastorale de la Mobilité Humaine ou Pastorale des Migrants et des Itinérants).

4° Mu zola kwa mono mosi ngyeti laandila kinzoonzi kya M'fuma. Kilaandaanga mawoonsono ko. Ibakaanga ndweenga mu make ye meengi. Kaansi vena mpe ye maambu man'kaka matekama mavovokaanga mu M'fuma. Ntaangu ye bisadulu bike mu laandila ye suungika mo. Ku nsuka, boonso yaloomba dyo kwa ba-n'twaadisi myeeto mya M'fuma, mbote bavuundisa ngongolo a n'kaanda myaame nate ngyena kubaloomba nzibululu ku se ntwaala. Kadi salu kina y'aame kya ngolo mu ntaangu yaayi. Kwa babo : lusaala mu yeenge ye zola. Mono weeno mpaangi,

A. KAVANDAKO, Pfumu Tsaku, Mwaan'a Vita-Nimi.

Ku Bukaka KAPELA <manu.kapela@numericable.fr>